Sali Berisha u shfaq i pakënaqur me vendimin e Gjykatës Kushtetuese, sipas të cilit qëndrimi i tij në arrest shtëpie është konsideruar i zgjatur. Pas daljes nga SPAK, ku u paraqit si çdo dy javë, kreu i PD-së reagoi ashpër ndaj vendimit, duke e cilësuar atë politik dhe të diktuar nga Partia Socialiste.
“GJK është një seksion i organizatës së PS-së. Së pari, atë çështje Gjykata Kushtetuese e trajtoi pas 8 muajsh nga paraqitja, në një kohë kur çdo çështje që ka të bëjë me qeveritarët e trajton brenda 3 javëve. Së dyti, GJK me një vendim të koduar partiak shpalli jokushtetues vendimin ndaj meje, por nuk e shfuqizoi atë, ndërkohë që ai vendim ka pasoja edhe sot. Pra, nuk e shfuqizoi duke pretenduar se nuk është më në fuqi, por në fuqi janë pasojat e tij”, deklaroi Berisha.
Sipas tij, mënyra se si Gjykata Kushtetuese e ka trajtuar çështjen përbën standard të dyfishtë dhe dëshmi të kapjes politike të institucionit. Berisha theksoi se, edhe pse vendimi është shpallur jokushtetues, mosshfuqizimi i tij ka lënë në fuqi efektet që, sipas tij, vazhdojnë të prodhojnë pasoja konkrete.
Kreu i PD-së e cilësoi këtë situatë si një tjetër provë të ndërhyrjes politike në sistemin e drejtësisë dhe paralajmëroi se do të vijojë denoncimin publik të asaj që ai e quan përdorim partiak të institucioneve kushtetuese.
