Kreu i Partisë Demokratike, Sali Berisha, deklaroi sot se opozita e ka fituar betejën politike me qeverinë, duke shtuar se tashmë mbetet vetëm largimi i Edi Rama.
Sipas Berishës, protesta dhe “kryengritja paqësore” e opozitës ka tronditur në themele regjimin dhe ka pasur jehonë të fortë në Europë dhe në botë. Ai tha se opozita ka mbrojtur dinjitetin e vendit dhe ka përmbushur misionin e saj për “shpëtimin e Shqipërisë”.
Berisha u shpreh se revolta qytetare e ka vendosur Ramën “me shpatulla pas muri”, duke e akuzuar atë për përpjekje për të ndryshuar ligjet me qëllim mbrojtjen e vetes dhe bashkëpunëtorëve të tij nga ndëshkimi ligjor.
Sipas tij, këto lëvizje shënojnë “agoninë politike” të kryeministrit dhe tregojnë se opozita ndodhet në “kilometrin e fundit” të betejës së saj. Megjithatë, Berisha theksoi se lufta nuk ka përfunduar ende dhe se fitorja përfundimtare do të vijë vetëm përmes një kryengritjeje të qëndrueshme qytetare.
“Ne e kemi vënë përpara regjimin, por lufta fitohet me vazhdimësinë e kësaj kryengritjeje”, u shpreh ai, duke shtuar se shqiptarët janë sot më të gatshëm se kurrë për t’u ndarë me këtë qeveri.
