Kryetari i Partisë Demokratike, Sali Berisha, ka konfirmuar aleancën politike me Adriatik Lapajn, duke bërë të ditur se protesta e PD dhe ajo e Lapajt do të zhvillohen paralelisht, me ndarjen e sheshit përpara Kryeministrisë, të hënën pasdite.
Gjatë një bashkëbisedimi me qytetarët në rrjetet sociale, Berisha deklaroi se Adriatik Lapaj është i mirëpritur në protestën që Partia Demokratike do të organizojë më 22 dhjetor, duke theksuar se PD nuk e përjashton dhe as nuk e pengon praninë e tij.
Berisha vlerësoi publikisht protestën e Lapajt para Kryeministrisë, duke e cilësuar atë si një akt të drejtë dhe legjitim qytetar.
“Lapaj nuk përjashtohet nga protesta jonë dhe unë e përshëndes atë dhe e kam përshëndetur edhe gjestin e tij, edhe aktin e tij, edhe protestën e tij të drejtë”, u shpreh Berisha.
Deklarata e kreut të PD-së vjen në një moment kur protestat opozitare po intensifikohen dhe sinjalizon një koordinim të hapur mes forcave opozitare jashtë dhe brenda strukturave tradicionale partiake, me fokus të përbashkët kundërshtimin e qeverisë dhe kryeministrit Edi Rama.
