Kryetari i Partisë Demokratike, Sali Berisha, ka komentuar investimet amerikane në Jug të vendit nga kompania e Jared Kushner, dhëndri i Donald Trump, duke akuzuar kryeministrin Edi Rama për përdorim politik të kësaj marrëveshjeje.
Duke folur jashtë Parlamentit, Berisha deklaroi se Rama ka tentuar të ushtrojë influencë politike përmes investimeve, por sipas tij kjo përpjekje ka dështuar.
Ai u shpreh se edhe qeveria e tij e ka ofruar më herët ishullin e Sazanit për investime, përfshirë një ofertë drejtuar ish-kryeministrit italian Silvio Berlusconi, e cila ishte pranuar, por nuk u realizua për shkak të krizës financiare.
“Sazanin edhe qeveria ime e ka ofruar. E ka ofruar edhe Fatos Nano para meje. Berlusconi e pranoi, por ra kriza financiare dhe nuk u realizua,” tha Berisha.
Sipas tij, Rama nuk e ka firmosur marrëveshjen për Sazanin para zgjedhjes së Donald Trump si president i SHBA-së, siç ishte parashikuar.
“Sa i përket Zvernecit, është një çështje private me pronarët. Nuk do të jepet tokë publike. Sa i takon Sazanit, ne i mbështesim investimet amerikane, por Rama e bëri këtë për influencë politike dhe dështoi. Po të mos dështonte, nuk do të detyrohej të bënte atë që unë e quaj ‘gazin e dheut’ me presidentin amerikan,” u shpreh Berisha.
Ai shtoi se nuk ka kundërshtim ndaj realizimit të investimeve nëse ato ecin përpara, por akuzoi kryeministrin për mashtrim dhe keqmenaxhim të procesit.
“Nëse marrëveshja ishte që të firmosej para zgjedhjes së Trump, Rama mashtroi dhe nuk e firmosi para zgjedhjeve,” deklaroi kreu i opozitës.
