Protesta e radhës e Partisë Demokratike u zhvillua sot para Kryeministrisë, në javën e dytë të asaj që është cilësuar si “Foltore parlamentare-qytetare”. Ndryshe nga java e kaluar, pjesëmarrja ishte dukshëm më e dobët, me një numër më të vogël qytetarësh dhe mbështetësish të opozitës të pranishëm në shesh.
Nga foltorja e ngritur përballë godinës qeveritare, Sali Berisha u shpreh se vjen “drejtpërdrejt nga Brazili” për të garantuar demokratët se “nuk janë vetëm në betejën me të keqen”. Ai theksoi se opozita gëzon, sipas tij, “mbështetje më të madhe se kurrë nga njerëzit e lirë në mbarë botën”.
Ndërsa retorika e liderit të PD-së ishte e fortë, dinamika e protestës tregoi një realitet tjetër. Foltoren e morën kryesisht deputetë të Partisë Demokratike, ndërsa “dekorin” e tubimit e plotësonin disa të rinj, të cilët flisnin më shumë për politikat e mëdha të vendit sesa për problemet konkrete të brezit të tyre.
Edhe pse e konceptuar si një foltore “parlamentare-qytetare”, prezenca e qytetarëve ishte modeste, shumë më poshtë se pritshmëritë dhe krahasuar me javën e parë të protestës. Opozita ka paralajmëruar vijimin e këtyre mbledhjeve çdo javë, si formë presioni ndaj qeverisë.
