Nga Foltorja me demokratët e degëve 8 dhe 10 në Tiranë, Sali Berisha lëshoi akuza të forta ndaj kryeministrit Edi Rama, duke pretenduar se vendimi i pritshëm i Gjykatës Kushtetuese për çështjen e Belinda Ballukut po diktohet politikisht nga kreu i qeverisë.
Sipas Berishës, Rama ka dhënë urdhër që vendimi të merret sonte me pesë vota pro, jo për hir të ligjit, por për të mbrojtur Ballukun dhe, në thelb, “karrigen e tij të pushtetit”. Ai e cilësoi këtë si një ndërhyrje flagrante në drejtësi dhe një kërcënim për pavarësinë e institucioneve.
Me tone tejet të ashpra, Berisha tha se pikërisht në momentin që ai po fliste para demokratëve, “organizata kriminale e Edi Ramës” kishte urdhëruar gjykatësit të votonin në favor të Ballukut.
“Sot, në momentin që mblidhemi këtu, organizata kriminale voton kundër interesave më jetike të çdo qytetari shqiptar. Voton që një grup hajdutësh, të cilin Shqipëria nuk e ka pasur kurrë në histori, të vazhdojë të vjedhë miliarda të tjerë,” deklaroi ai.
Berisha paralajmëroi se një vendim i tillë do të kishte pasoja të rënda politike dhe ndërkombëtare për Shqipërinë. Sipas tij, ai rrezikon të “këpusë çdo urë lidhjeje” me Bashkimin Europian dhe të kthejë pas procesin e integrimit.
“Ky vendim mund të bëjë zero të gjitha përpjekjet tona 35-vjeçare për t’u integruar në BE. Ata po votojnë pasi kanë marrë mesazhin se kjo çështje është themelore jo vetëm për ne, por edhe për Brukselin,” theksoi Berisha.
Ai shtoi se, në thelb, Balluku është vetëm “emri fiktiv” në këtë histori, ndërsa aferat i përkasin kryeministrit.
Një element që ra në sy në këtë dalje ishte se Berisha, ashtu siç ka bërë këto ditët e fundit – dhe ndryshe nga herët e tjera – sërish shmangu përmendjen me emra të anëtarëve të Gjykatës Kushtetuese që, sipas tij, pritet të votojnë pro qeverisë, edhe pse vetë ai ka lënë të kuptohet se i njeh shumë mirë qëndrimet e tyre.
