Kryetari i Partisë Demokratike, Sali Berisha, e cilësoi si kërcënim ndaj SPAK dhe GJKKO postimin e kryeministrit Edi Rama lidhur me vendimin e Gjykatës Kushtetuese për pezullimin nga detyra të Belinda Ballukut.
Në deklaratën për mediat, Berisha u shpreh se mungesa e emergjencës në trajtimin e çështjes së imunitetit dhe hapësira për ndryshime në legjislacion tregojnë se Rama synon ta mbrojë Ballukun deri në fund.
“Sot Rama kërcënoi prokurorinë dhe gjykatën dhe u zotua se do të mbrojë deri në pikën e fundit veten dhe Ballukun. Ai është thirrur sot në Bruksel, sipas mediave. Ju e shihni, ai shkon në Bruksel me fustanin e Lubi Ballukut. Në kuptimin që shkon si avokat i turpshëm i saj dhe gjithçka e ka prej saj. Në Bruksel dhe në mbarë kryeqytetet është kuptuar se çfarë përfaqëson, çfarë kalbësire përfaqëson Rama”, tha Berisha.
Megjithëse kryedemokrati kritikon kryeministrin për sulme ndaj gjykatave, në këtë pikë nuk kanë shumë ndryshim me njëri tjetrin, sepse të njëjtën gjë bën dhe Berisha sa herë vendimet nuk përputhen me interesat e tij.
Ai nuk kurseu kritikat ndaj Gjykatës Kushtetuese për vendimin e Ballukut, pasi sipas tij, gjyqtarët që votuan 4 me 4 kanë marrë vendimin nën diktatin e Edi Ramës.
“Nuk mund të ndodhte ai vendim 4 me 4. Pavarësisht se pezullimi mbeti në fuqi, ai nuk duhej të mbetej për votat e katër gjyqtarëve, por me votat e të gjithëve. Ky është edhe një dëshmi tjetër e paralizës së Gjykatës Kushtetuese nga ekzekutivi”, u shpreh Berisha.
Megjithatë, kreu i PD nuk guxoi të përmendë emrat e gjyqtarëve që, sipas tij, janë nën diktatin e Ramës.
Njëjtë siç nguroi të përmend emrat e biznesmenëve që po përplasen me banorët e Rrjollit në Velipojë, të cilët pretenodojnë se po u grabiten pronat. Berisha shpjegoi se arsyeja pse PD nuk ka shkuar për t’i mbështetur në protestën e tyre është për të verifikuar nëse pretendimet bazohen në dokumentacion zyrtar.
“Padiskutim, kur problemet bazohen në dokumente të sakta dhe zyrtare, unë nuk i diskutoj. Apriori nuk hedh poshtë asnjë pretendim të protestuesve, ndaj edhe po e ndjekim çështjen. Por gjithçka duhet të bazohet mbi dokumente”, tha ai.
Sali Berisha u pyet gjithashtu edhe për rritjen e çmimit të biletës së urbanit për linjën e Kamzës, e cila u miratua edhe me votat e Partisë Demokratike. Ndonëse kanë kaluar pothuajse tre muaj, Berisha deklaroi se ende nuk është informuar për këtë rast. Sipas tij, vetëm pasi të njihet me detajet, do të shohë se çfarë mund të bëhet.
