Sali Berisha u pyet në konferencën e sotme se pse PD nuk ka mbështetur protestën e banorëve të Baks-Rrjollit në Velipojë, të cilët akuzojnë biznesmenin Bashkim Ulaj se po u grabit tokat për ndërtimin e një resorti turistik me ndihmën e institucioneve vendore.
Ndryshe nga herët e tjera, kur mbështet me forcë protestat e qytetarëve që nuk thirren prej tij, kreu i PD-së u tregua i kujdesshëm dhe dha një përgjigje më shumë zyrtare, duke thënë se e mbështet protestën e tyre, por vetëm me kushtin që pretendimet të bazohen në dokumente zyrtare.
“Natyrisht, ne e mbështesim protestën pa diskutim, kur problemet janë gjithçka të bazuara mbi dokumente të sakta, zyrtare, të vërteta, çka unë nuk i diskutoj. Apriori nuk hedh poshtë asnjë pretendim të atyre protestuesve, ndaj dhe ne po shohim, po e ndjekim. A duhet të bazohet mbi dokumente? Duhet. Sepse nuk kam asnjë lloj dijenie nëse është blerë apo nuk është blerë. Ne po e ndjekim këtë zhvillim”, u shpreh kryedemokrati.
Ndoshta është rastësi, por përgjigjja e Berishës është në linjë me reagimet publike të kompanisë, e cila thekson se projekti është i bazuar në dokumente.
Megjithatë, qëndrimi i kryedemokratit për protestën në fjalë nxjerr në pah “sikletin” që ai ka kur bëhet fjalë për emra biznesmenësh që kurrë nuk i përmend.
Meqë kreu i PD-së shprehet se mbështetja për ta do të vijojë vetëm nëse pretendimet e banorëve janë të bazuara në dokumente, lind pyetja pse asnjë përfaqësues demokrat nuk ka shkuar t’i verifikojë këto “pikëpyetje”, ndërkohë që banorët kanë gjashtë ditë që protestojnë.
