Kryetari i Partisë Demokratike, Sali Berisha, e përshëndeti qëndrimin e kandidatit Florian Binaj, i cili tha se nuk do dalë në fushatë me kryetarët e partive opozitare që e mbështesin. Madje, Berisha qëndrimin e Binajt e sqaroi në detaje se pse është i drejtë duke shpjeguar dallimin mes kandidatit të pavarur dhe atij që propozohet nga partitë politike.
“E përshëndes plotësisht këtë deklaratë. Ka një grup, një rymë të cilët vërtetë nuk realizojnë dallimin dot mes kandidatit të pavarur të mbështetur nga partitë politike dhe kandidatit jo partuiak të propozuar nga partitë politike. Kandidati jo partiak i propozuar nga partitë politike është kandidat i partisë politike. Kandidati i pavarur të cili kandidon në mënyrë të pavarur por partitë politike e gjejnë të përshtatshëm për ta mbështetur në interesin më të mirë të qytetarëve, absolutisht. Në qoftë se është i pavarur nuk ka pse të bëjë asnjë fushatë me kryetarët e partive. Po kryetarët e partive do të angazhohen me të gjithë fuqitë e tyre për të mobilizuar elektoratin partiak për të votuar atë”, tha Berisha.
Kreu i PD gjithashtu përsëriti meritat që ka për të mbështetur Florian Binajn, duke thënë se një javë rresht është marrë për të gjetur e modelin e duhur.
“Gjatë një jave rresht unë jam marrë me çështjen e modelit pikërisht për transparencë. Dhe jo të gjithë njerëzit e realizojnë modelin. Pastaj rryma keqdashëse, ndjellakeqëse e cila e tërbuar nga fakti se ky kandidat i pavarur ka premisa të ketë mbështetje të gjerë në elektoratin shqiptar të pavendosur, gri po qoftë dhe të spektrit më të gjerë të mundshë”, tha Berisha.
