Sali Berisha dhe grupimi më i ri që nuk e sheh më si alternativë drejtimin e tij të PD-së vijojnë të shkëmbejnë në distancë akuza, replika dhe paralajmërime për ristrukturimin e partisë. Teksa Berisha këmbëngul se PD “i ka dyert e hapura për çdo alternativë”, Ilir Alimehmeti — në një intervistë për Euronews — jep një përgjigje të ftohtë, të drejtpërdrejtë dhe të artikuluar qartë:
“Pas një katastrofe si 11 maji, duhet t’u flasësh njerëzve. Edhe pse nuk jam në kryesi, kam detyrë të përfaqësoj zërin e tyre. Ky është zëri i tyre. Nuk mund të shkojmë në një qëndrim të shurdhër ndaj kërkesave të bazës demokratike dhe qytetarëve.”
Ai thekson se kauzat e tubimeve janë të drejta, por organizimi dhe përfaqësimi në PD “çalojnë me të dyja këmbët”.Në të njëjtën intervistë, ai sqaron se takimi me demokratët ku mori pjesë nuk ishte as fraksion, as tentativë për parti të re, por një forum diskutimi për të dëgjuar bazën dhe për të mos i lënë demokratët në qorrsokak.
Berisha, ndërkohë, nuk priti gjatë për të marrë fjalën. Si kundërpërgjigje ndaj lëvizjes së paralajmëruar nga Salianji, Alimehmeti dhe të tjerë të votuar në primare, ai shpalli:
“Këtë javë fillojmë foltoret jashtë Tiranë dhe do të vazhdojmë në të gjithë vendin.”
Kjo përpjekje për të zotëruar narrativen qartas shënon frikën që kryetari demokrat ka për ndonjë rebelim të mundshëm në selinë që ai e ka zotëruar me forcë dhe hera-herës dhe me dhunë këto 34 vjet. Lëvizja e fundit nuk është as e paparë dhe as e padëgjuar në Partinë Demokratike. Risa e vetme është se ajo i gjen demokratët më të telendisur se kurrë sikundër në këtë gjendje dhe në situatën ku ndodhet qeveria e Edi Ramës, Partia Demokratike dhe Sali Berisha janë shndërruar në patericën e domosdoshme të narko-regjimit — siç i pëlqen kryetarit demokrat ta quajë qeverinë e PS.
