Sali Berisha foli sot sërish për pjesëmarrjen e PD-së në Komisionin e Reformës Territoriale, duke theksuar se bashkëpunimi me PS-në e sheh thuajse të pamundur.
Në një takim me demokratët e Njësisë 7 në Tiranë, kryetari i PD-së tha se socialistët kanë ndërmend të zbresin në 28–30 bashki dhe se kjo është “platformë e shpopullimit të shqiptarëve dhe asgjësimit të të gjitha shërbimeve për ta”.
Sipas Berishës, kjo qasje synon të zhdukë shërbimet publike në territor dhe të centralizojë gjithçka në duart e qeverisë. Ai e quajti këtë strategji një mashtrim politik, duke shtuar me tone të ashpra: “ky thotë merrni e-Albania, merrni ‘Diellën’, një sharlatan”.
Berisha pranoi se për të qenë pjesë e këtij komisioni ai u detyrua nga presioni i disa deputetëve. “Ne kishim presion real nga njerëzit tanë që duhet të jemi në reformë, sepse kur u bë e para, PD bojkotoi. Ne tani do bëjmë projektin tonë, do jua paraqesim ju dhe gjithë shqiptarëve dhe në Komision, dhe do sqarojmë se cili është propozimi ynë.”
Megjithatë, Berisha u shpreh sërish i paqartë mbi rolin real të PD-së në këtë proces, duke nënvizuar se Rama “nuk do ta pranojë” propozimin e opozitës, sepse “e di se po shkon drejt fundit”.
Ai la të kuptohet se, pavarësisht përpjekjeve të disa deputetëve për të qenë pjesë integrale e hartimit të reformës territoriale, PD vështirë se do të ketë ndikim të drejtpërdrejtë në vendimmarrje.
