Kreu i Partisë Demokratike, Sali Berisha, ka bërë të ditur se PD nuk do të mbështesë kandidaturën e Niko Peleshit për kryetar të Kuvendit të Shqipërisë.
Në një prononcim për mediat para nisjes së seancës së parë të legjislaturës së re, Berisha u shpreh se emri i propozuar nga kryeministri Edi Rama nuk është i pranueshëm për opozitën. “Nuk do ta votojmë. Nëse do të votosh Peleshin, është njëlloj si të votosh bandën e tij në Korçë,” deklaroi ai.
I pyetur gjithashtu nëse PD do të bojkotojë zgjedhjet e parakohshme në Bashkinë e Tiranës, Berisha tha se bojkoti është një mundësi dhe mund të përdoret si “armë e formë”, madje “ndoshta forma më e lehtë”. Ai shtoi se ka strategji të ndryshme për të ardhmen dhe nuk mund të bëjë të qartë qëndrimin për momentin.
