“Partia Demokratike nuk bëhet pjesë në mënyrë absolute në asnjë ndërhyrje”, kështu u shpreh Sali Berisha, kur u pyet nëse PD do të bëhej pjesë e një iniciative të mazhorancës për ndryshime në sistemin e drejtësisë.
Përgjigjja e kreut të PD vjen një ditë pasi kryetari i Komisionit të Ligjeve, Ulsi Manja, ua bëri të qartë prokurorëve dhe gjyqtarëve mesazhin se, nëse nuk ngrihen në nivelin e “drejtësisë cilësore”, mazhoranca do të ndërhyjë.
Në deklaratën e sotme për mediat, Berisha tha se gjyqtarët kanë të drejtë të pretendojnë një piramidë pagash në frymën e Kushtetutës dhe ligjeve.
Megjithatë, kryedemokrati i qëndron mendimit se një grup prokurorësh janë superpaguar nga kryeministri Edi Rama, që sipas tij të sulmojnë opozitën. Berisha i quajti ata “mercenarë të superpaguar” në një nga vendet me pagat më të ulëta, siç është Shqipëria.
Ai gjithashtu tha se Rama po sakrifikon integrimin e vendit për të mbrojtur veten. Sipas tij, BE po diskuton të zhbëjë procesin e integrimit të Shqipërisë në BE për shkak të qëndrimeve antikushtetuese që kryeministri po mban me Ballukun dhe dosjen e AKSHI-t.
