Kreu i Partisë Demokratike, Sali Berisha, akuzoi kreun e Gjykatës së Lartë, Sokol Sadushi, se po vepron në interes të kryebashkiakut Erion Veliaj. Në një deklaratë për mediat gjatë mbledhjes së grupit parlamentar të PD-së, Berisha paralajmëroi se vendimi i Gjykatës së Lartë që pritet të nxirret nesër do të jetë për heqjen e paraburgimit për persona pa vendim të formës së prerë. Sipas tij, ky vendim shërben për interesat e Veliajt, por do të përfitojnë edhe dhjetëra kriminelë.
“Nesër, Sadushi, në një akt që kërcënon absolutisht sigurinë e Shqipërisë dhe të vendeve të rajonit, del me vendimin që ata që janë në paraburgim pa vendim të prerë të lirohen. Ky është vendimi i Veliajt, ta quaj kështu. Por nga ky vendim përfitojnë dhjetëra bosë të drogës, krerë të organizatave kriminale”, deklaroi Berisha.
Kryedemokrati vijoi më tej duke akuzuar edhe drejtorin e ri të Burgjeve, Adriatik Kupi, për të cilin tha se është një nga eksponentët e aferës së njohur si “5D”. Berisha shtoi se emërimi i Kupit është një veprim i qëllimshëm nga kryeministri Rama, me qëllim rivendosjen e paqes me Erion Veliajn.
