Kryedemokrati Sali Berisha ka paralajmëruar kryeministrin Edi Rama se çdo sulm ndaj selisë së Partisë Demokratike do të pasohet me kundërpërgjigje ndaj selive të Partisë Socialiste në të gjithë vendin.
Deklarata e Berishës vjen një ditë pasi, sipas tij, në oborrin e selisë së PD-së janë hedhur sasi të mëdha gazi lotsjellës dhe bomba tymuese, të cilat ai i cilësoi si “agresion të hapur ndaj selisë së PD-së dhe pluralizmit”.
Berisha u bëri thirrje kryetarëve të degëve të Partisë Demokratike në të gjitha qarqet që të kryejnë verifikime pranë selive të PS-së në çdo rreth, duke theksuar se çdo sulm do të marrë përgjigjen përkatëse.
“Garantoj Edi Ramën se sulmet ndaj selisë së PD-së do të sjellin kundërpërgjigje ndaj selive të partisë së tij në të gjithë territorin e vendit”, deklaroi Berisha.
Ai i kërkoi kryeministrit të heqë dorë nga, siç u shpreh, “aventura dhe provokimi i ulët”, duke shtuar se beteja politike është me Ramën si kryeministër. “Nëse sulmoni selinë e PD-së, PD-ja do t’ju përgjigjet siç e meritoni. Hiq dorë nga sulmet ndaj selisë për të mbrojtur krimet dhe vjedhjet tuaja”, u shpreh ai.
