Ndërsa kritikoi kryeministrin për përplasjen me ndërkombëtarët për çështjen Balluku, kreu i PD, Sali Berisha, në deklaratën për mediat vijoi përplasjen e tij me ambasadorin e BE, Silvio Gonzato.
Berisha e akuzoi Gonzaton, duke thënë se sillet në Bruksel sikur është ambasador i Edi Ramës.
“Çfarëdo që të bëjmë ne, ambasadori i Bashkimit Europian në Tiranë, në Bruksel sillet në mënyrë absolute sikur të jetë ambasadori i Edi Ramës në Bruksel”, tha Berisha.
Kryedemokrati pretendon se ambasadori i BE, duke folur për skandalin e AKSHI-t në Bruksel, është shprehur se pengmarrja nuk është kulturë e shqiptarëve. Sipas Berishës, ky është ofendim ndaj shqiptarëve dhe se tek AKSHI bëheshin pengmarrje për interes të kunatit të Ramës.
“Sepse të shpallësh AKSHI-n në Bruksel problem kulturor të shqiptarëve, siç ka bërë zoti Gonzato, ky është shërbimi më i keq që u bën shqiptarëve, dhe unë i them atij zotëri se pengmarrja nuk është kulturë e shqiptarëve. Shkëlqesi, Shqipëria ka me dhjetëra agjenci të tjera shtetërore dhe jo-shtetërore. Problemi është se Rama nuk ka një kunat tjetër që të merret në fushën digjitale përveç Armand Frangut, dhe pikërisht pse është Armandi aty, kunati i Lindës, aty merren njerëzit peng”, tha ai.
Berisha vijoi më tej me akuzat ndaj Gonzatos, duke thënë se ky i fundit është shprehur në Bruksel se agjenda e PD është MAGA. Ai tha se kjo është një gënjeshtër e radhës e ambasadorit, pasi agjenda e demokratëve është integrimi i Shqipërisë në BE.
“Gënjeshtra e dytë e madhe e tij është për PD në Komitetin Ndërkombëtar: se agjenda e PD është MAGA. Agjenda jonë, nëse do të ishte MAGA, ne nuk e fshihnim. Agjenda jonë është integrimi në Bashkimin Europian”, tha Berisha.
Kjo nuk është deklarata e vetme që kreu i PD bën kundër ambasadorit të BE në Tiranë. Më herët, Berisha është përplasur edhe për ligjin për barazinë gjinore.
