Sali Berisha akuzoi mediat që, sipas tij, kontrollohen nga qeveria se po përpiqen “me çdo kusht” të mbajnë në këmbë pushtetin e Edi Ramës, duke shpërndarë propagandë dhe mashtrime 24 orë në ditë.
Në fjalimin e mbajtur në tubimin e përjavshëm të opozitës në Tiranë, Berisha falënderoi qytetarët që mblidhen çdo të hënë për të përfaqësuar, sipas tij, “zërin e vërtetë të shqiptarëve”, ndërsa e cilësoi platformën e fjalimeve si një hapësirë ku dëgjohet më qartë kundërshtimi ndaj qeverisë.
Në vijim të kritikave, ai u ndal gjatë tek roli i mediave, për të cilat tha se funksionojnë si instrument propagande për qeverinë. Sipas Berishës, debatet në studiot televizive e paraqesin Shqipërinë sikur të ishte një kryeqytet europian ku demokracia funksionon normalisht.
“Nëse i dëgjon, duket sikur po flasin për Pragën, Berlinin apo Parisin,” tha ai, duke shtuar se sipas tij këto media përpiqen të barazojnë qeverinë shqiptare me qeveritë e vendeve demokratike.
Megjithatë, kritikat ndaj mediave vijnë në një moment kur pothuajse çdo deklaratë, konferencë për shtyp apo dalje publike e Berishës transmetohet drejtpërdrejt nga shumica e televizioneve në vend – një paradoks që e bën konfliktin e tij me “mediat e regjimit” edhe më interesant për publikun.
