Në një komunikim me ndjekësit e tij në Facebook, Sali Berisha reagoi ashpër pas ndarjes 4 me 4 në Gjykatën Kushtetuese për çështjen e Belinda Ballukut, duke pretenduar se kërkesa e Edi Ramës “përfundoi në koshin e plehrave” dhe se katër gjyqtarë treguan guxim institucional.
Berisha e cilësoi kërkesën e kryeministrit si një tentativë për “grusht shteti kushtetues” ndaj shqiptarëve dhe akuzoi Gjykatën Kushtetuese se me zvarritjen dy mujore i dha Ballukut kohë për të “falsifikuar dokumente”.
Por përtej retorikës së fortë, deklarata e tij la në pah një paradoks të dukshëm politik.
Ndryshe nga praktika e tij e zakonshme ku ai përmend me emër, mbiemër dhe funksion pothuaj çdo gjyqtar e prokuror që kritikon, këtë herë Berisha nuk i përmendi emrat e katër gjyqtarëve që votuan në favor të Ballukut.
Ai u mjaftua vetëm me një pyetje retorike drejtuar publikut:
“Emrat e katër gjyqtarëve të Ballukut nuk i thotë askush. Jo për gjë, por në raste të tjera politika i merr me radhë gjeneralitetet e gjyqtarëve dhe prokurorëve.”
Në fakt, as vetë Berisha nuk i tha emrat.
Kjo shmangie bie në kontrast të plotë me stilin e tij politik, pasi në shumë raste të tjera ai ka përmendur publikisht dhe drejtpërdrejt emra gjyqtarësh e prokurorësh, duke i akuzuar, etiketuar apo ekspozuar.
Mbetet e paqartë pse në këtë rast ai zgjodhi të mos i identifikojë katër gjyqtarët që, sipas tij, votuan pro Ballukut duke e lënë çështjen në nivel insinuate dhe jo denoncimi konkret.
Në mbyllje të komunikimit, Berisha u bëri thirrje mbështetësve të opozitës që të “shumëfishojnë energjitë” në betejën për drejtësinë, duke e paraqitur ndarjen 4 me 4 si provë se presioni publik mbetet vendimtar.
Kjo qasje e pazakontë për Sali Berishën, në fakt, demaskon edhe qëndrimin real të tij karshi drejtësisë. Ai në fakt duket jo aq shumë i gëzuar nga ky vendim. Në analizë të fundit, vendimi i Gjykatës Kushtetuese nuk bëri gjë tjetër, veçse nuk lejoi që SPAK-ut t’i vendoseshin pengesa në punën e tij për goditjen e korrupsionit të politikanëve të djeshëm dhe të sotëm. Është një vendim pra që e nxjerr sot SPAK-un më të fortë se dje. Dhe njëri prej atyre që e godet përditë SPAK-un, sepse nuk e do atë të fortë dhe të papërkulur përveç Edi Ramës është vetë Sali Berisha. Ndaj ky është edhe çelësi i leximit se pse Sali Berishës i është mbyllur goja.
