Sali Berisha nuk e ka kursyer sot Gjykatën Kushtetuese për shtyrjen pa afat të vendimit për çështjen Balluku. Në një konferencë për mediat, ai e cilësoi këtë gjykatë si “strofulla e fundit e hajdutëve të shqiptarëve”.
Sipas tij, mungesa e një vendimi për zëvendëskryeministren Belinda Balluku tregon se disa anëtarë të GJK janë të gatshëm të shkelin ligjin dhe Kushtetutën vetëm për të zbatuar, siç tha ai, urdhrat e kryeministrit Edi Rama.
Berisha u shpreh:
“Dita e djeshme faktoi se GJK është strofulla e fundit e hajdutëve tuaj. Në një akt ekstrem poshtërimi, ata që Kushtetuta i përcakton si garantë të saj po provojnë para syve tuaj se janë strofulla e fundit e narkoshtetit. Ata zotërinj e zonja — jo të gjithë sigurisht — dëshmojnë se janë të gatshëm të shkelmojnë ligjin, Kushtetutën dhe moralin vetëm për të zbatuar përulësisht urdhrat e Ramës.”
Megjithatë, ndryshe nga herët e tjera, Berisha nuk përmendi me emra anëtarët e Gjykatës Kushtetuese që sipas tij po bllokojnë vendimin. Kjo heshtje bie në kontrast me praktikën e tij të mëparshme, kur në rastin e SPAK-ut apo për vendime të ngjashme të GJK ai i ka përmendur publikisht prokurorët apo gjykatësit një nga një dhe emër për emër.
Arsyet për këtë zgjedhje i di vetë Berisha, por ato mund të lidhen me ndikimin e Partisë Demokratike në këtë gjykatë, veçanërisht përmes dy anëtarëve: Sonila Bejtja dhe Gent Ibrahimi. Të dy këta kanë ndryshuar qëndrime në vendime të mëparshme sa herë janë përballur me presionin e Berishës — e para për shkak të lidhjeve të saj me PD, ndërsa i dyti si “i telendisuri” prej tij sa herë i është dashur politikisht. Dhe sot i kursyeri i madh për të njëjtat arsye.
Në fund, Berisha u fut edhe në debatin për pagat, duke shprehur pakënaqësinë pse një prokuror i SPAK-ut paguhet më shumë se një prokuror rrethi — një linjë argumentimi e ngjashme me atë të nisur më herët nga kryeministri për pagat e gjyqtarëve.
