Sali Berisha ka sulmuar ashpër Top Channel një ditë pas intervistës së ish-drejtoreshës së AKSHI-t, Mirlinda Karçanajt, duke e akuzuar televizionin për manipulim dhe mbrojtje të qeverisë së Edi Ramës.
Në një deklaratë nga selia e PD-së, Berisha përdori tone të ashpra ndaj drejtimit të televizionit.
“Top Channel, që drejtohet nga një kumarxheshë e papërmbajtur, milionat që grabit nga ju me Edi Ramën dhe ministrat, i përdor për t’ju mashtruar”, deklaroi ai.
Berisha u bëri thirrje qytetarëve që të “hedhin poshtë me përçmim mashtrimet” dhe të përdorin rrjetet sociale për të kundërshtuar atë që e quajti “mafie e fjalës së lirë”.
Sipas kreut të PD-së, intervista e transmetuar një natë më parë kishte për qëllim mbulimin e “mashtrimeve të Edi Ramës”, pasi sipas tij mediat dhe dokumentet e SPAK-ut kanë rrëzuar pretendimet e kryeministrit.
