Sali Berisha ka sulmuar publikisht sot Agron Shehaj gjatë një sesioni pyetje-përgjigje me ndjekësit në Facebook, pasi u pyet pse Shehaj kishte refuzuar të marrë pjesë në tryezën e dialogut opozitar të thirrur nga Partia Demokratike. Në përgjigjen e tij, Berisha jo vetëm që justifikoi ftesën për bashkim opozitar, por e shndërroi refuzimin e Shehajt në objekt akuze politike.
Berisha e la përgjegjësinë e shpjegimit tek vetë Shehaj, por e shoqëroi këtë me një akuzë të drejtpërdrejtë politike dhe morale.
Sipas tij, Shehaj po bën një krahasim të papranueshëm mes PD-së dhe Partia Socialiste, duke u vetëquajtur i persekutuar dhe duke barazuar një forcë politike që “çliroi nga burgjet dhe persekutimi” me një tjetër që, sipas Berishës, “persekutoi paraardhësit e tij”.
“Çdo njeri është i lirë të thotë çfarë të dojë,” u shpreh Berisha, “por unë kam një bindje të qartë: zgjedhësit që kanë votuar Agron Shehajn nuk e kanë bërë këtë që ai të refuzojë bashkimin në një front të gjerë opozitar për të larguar të keqen më të madhe, Edi Ramën.”
Kryetari i PD-së e çoi më tej kritiken, duke etiketuar si problematik çdo qëndrim që, sipas tij, fragmenton opozitën. “Ata që duan të bëjnë opozitën e opozitës janë faktikisht në shërbim të tjetërkujt,” deklaroi Berisha, duke nënkuptuar se refuzimi i bashkëpunimit opozitar i shërben në fund qeverisë së Edi Rama.
