Kreu i Partisë Demokratike, Sali Berisha, ka deklaruar se ndryshe nga kryeministri Edi Rama, ai nuk sulmon gjyqtarët dhe prokurorët pa prova. Në konferencën e sotme për mediat, Berisha e vuri veten në rolin e mbrojtësit të ligjit dhe të së vërtetës, ndërsa vijoi sërish me sulme të drejtpërdrejta ndaj përfaqësuesve të drejtësisë që po merren me çështjet e tij.
“Ata zbatojnë ligjin, ky i sulmon. Kurse unë luftoj për ligjin, nuk sulmoj unë gjykatës pa fakte”, u shpreh Berisha, duke aluduar se akuzat e tij janë të justifikuara, ndryshe nga sjellja e qeverisë.
Por ajo që bie në sy është se përgjigja e Berishës nuk la vend për asnjë reflektim. Kreu i PD-së i qëndron linjës së tij, të sulmojë publikisht çdo prokuror apo gjyqtar që nuk i përshtatet interesit të tij politik apo personal. Kështu ndodhi edhe sot, ku ai e vazhdoi me të njëjtën gjuhë kundër drejtuesit të SPAK, Altin Dumani, dhe gjyqtares Irena Gjoka.
“Nëse kam folur për Irena Gjokën, jeni dëshmitarë që për çdo denoncim kam nxjerr të vërtetën. Kam deklaruar se e kam shkarkuar për korrupsion. Kam deklaruar se është përzënë nga Greqia për mungesë dokumentesh. E ka mohuar. Kam deklaruar se ka qenë e dënuar me burg. E ka mohuar. Kam deklaruar se ajo këto nuk i ka deklaruar në formularin e dekriminalizimit. Dhe kjo përbën krim. Ky mercenar, ushtar i Imer Lalës, (Dumani), amniston krimin elektoral! Kam paraqitur para jush dosjet”, tha Berisha.
Në një vend ku historia politike e tri dekadave është e mbushur me sulme ndaj institucioneve të drejtësisë, gjuha e urrejtjes dhe denigrimi personal vazhdojnë të jenë pjesë e strategjisë së politikanëve të tranzicionit. Dhe paradoksi shqiptar shfaqet sërish, edhe kur ndodh një tragjedi, si vrasja në ambientet e gjykatës së apelit, politikanët shprehin ngushëllime, për t’u kthyer të nesërmen në po të njëjtat sulme që ushqejnë klimën e dhunës dhe pasigurisë.
