Ndonëse Gjykata Kushtetuese nuk është shprehur ende zyrtarisht për kryetarin e Bashkisë së Tiranës, Erion Veliaj, kreu i PD, Sali Berisha, ka nxituar ta marrë të mirëqenë se vendimi do të jetë në favor të kryebashkiakut. Në një deklaratë për mediat pas mbledhjes së Kryesisë, Berisha e cilësoi këtë si një dhuratë që Ramës do t’i bëjë Veliajt, pasi e trajtoi si “serial killer” në burg.
Kreu i PD madje i qau hallin Veliajt për trajtimin që i bënë në qeli, saqë tha se ishte i detyruar ta merrte në mbrojtje për të drejtat e tij. Berisha vazhdoi më tej duke thënë se me trajtimin që i bënë Veliajt në burg, janë shkelur Konventa Evropiane e të Drejtave të Njeriut, Kushtetuta dhe çdo lloj standardi të qëndrimit të një shteti ndaj të burgosurve.
“Një dhuratë që Edi Rama, që nuk njeh asnjë lloj ligji dhe morali, i bëri padashje kundërshtarit të tij kryesor brenda në parti, Erion Velisë. Sepse e trajtoi atë siç e tha, si serial killer në qeli, e trajtoi në atë shkallë saqë detyrohesha unë që një njeriu që nuk duhej t’ia dëgjoja emrin, detyrohesha t’i dilja zot për të drejtat themelore që ka njeriu. E trajtoi në atë mënyrë që shkeli Konventën Evropiane të të Drejtave të Njeriut, Kushtetutën dhe çdo lloj standardi të qëndrimit të një shteti ndaj të burgosurve. Dhe me këto ai i dha Erion Velisë avantazhin e sotëm defakto”, është shprehur Berisha.
Deklarata e Berishës krijon përshtypjen se kryedemokrati dëshiron një vendim në favor të Veliajt si triumf për trajtimin që i është bërë në burg. Ndonëse kjo e heq mundësinë që PD të rifitojë Bashkinë, për këtë rast lë në detyrë një kryebashkiak që PD e ka protestuar dhe e ka akuzuar për korrupsion.
