Kryetari i PD Sali Berisha është paraqitur këtë të hënë në ambientet e SPAK, në zbatim të masës së sigurisë “detyrim paraqitjeje”, në kuadër të hetimeve për dosjen “Partizani”.
Pas paraqitjes në SPAK, Berisha hodhi akuza të forta ndaj sistemit të drejtësisë, duke e cilësuar atë si “turp dhe qesharak”.
Ai përmendi rastin e gjyqtares Irena Gjoka dhe akuzoi ish drejtuesin e SPAK, Altin Dumani, se sipas tij e ka mbrojtur atë përmes hetimeve pa emër. “Nëqoftëse ka një sistem turpi dhe qesharak është sistemi i kësaj drejtësie. Do t’ju jap vetëm një shembull. Irena me pesë mbiemra, e cila mbrohet nga Altin Dumani, sepse për ta mbrojtur i ka hapur hetim pa emër, për ta mbrojtur nga çdo lloj mase…”, u shpreh Berisha.
Ai kritikoi gjithashtu edhe institucionet e tjera të drejtësisë, duke përmendur Prokurorine e Përgjithshme e Shqipërisë dhe Këshillin e Lartë Gjyqësor, të cilat sipas tij kanë zvarritur dhe kanë mbrojtur vendime që ai i konsideron të padrejta.
