Partia Demokratike mbajti Foltoren e radhës para Kryeministrisë, pa ndonjë risi apo ndryshim nga ato të mëparshmet.
Duke e mbajtur fokusin tek protestat kundër qeverisë, Berisha u tha të pranishmëve, që ishin shumë më pak në numër, se tubimi i 24 janarit lebetiti qeverinë.
“Lebetitëm një regjim anti-shqiptar, armik të këtij kombi. Dërguan në të katër anët e botës, në të gjitha sheshet e kryeqyteteve, në të gjitha kancelaritë, të NATO-s, BE-së dhe në Uashington mesazhin e qytetarëve shqiptarë që nuk pajtohen kurrë me një regjim që i plaçkit çdo ditë”, tha Berisha.
Megjithëse protesta e shkuar në realitet nuk ka lëkundur qeverinë, sipas kreut të PD-së, ajo e 10 shkurtit do të jetë data e radhës që do të trondisë regjimin.
Për këtë, ai u bëri thirrje të rinjve t’i bashkohen tubimit javës që vjen për t’i dhënë, sipas tij, mësimin e merituar narkokracisë së Tiranës.
