Kreu i Partisë Demokratike, Sali Berisha, shkoi në QSUT për të vizituar deputetin e PD-së, Bledion Nallbati, i cili u lëndua gjatë përplasjeve para Kuvendit dhe u shoqërua për trajtim mjekësor.
Pas takimit me mjekët, Berisha dha detaje për gjendjen shëndetësore të deputetit, duke theksuar se ai ka pësuar një hematomë dhe do të mbahet nën vëzhgim.
“Ka një hematomë dhe, sipas protokollit, do të qëndrojë në observim për një kohë për të parë nëse ka pasoja të tjera nga goditja,” tha Berisha.
Në të njëjtën kohë, kryetari i PD-së lëshoi akuza të forta ndaj drejtuesve të policisë, duke përmendur emrin e Sokol Bizhgës si urdhërdhënës të ndërhyrjes së dhunshme.
“Sipas informacioneve që kemi, urdhërdhënësi është krimineli i damkosur Sokol Bizhga, një nga kriminelët më të njohur me uniformë në Republikën e Shqipërisë. E garantoj Sokol Bizhgën se do të mbajë përgjegjësi deri në ditët e fundit të jetës së tij,” deklaroi ai.
Gjithashtu, Berisha pretendoi se dëmtimi i operatorit të News 24, Aldo Kashri, nuk erdhi nga molotovët e protestuesve, por nga veprimet e forcave të rendit.
Sipas tij, kjo provon se policia ka vepruar në mënyrë të papërgjegjshme dhe të dhunshme ndaj mediave dhe protestuesve.
