Sali Berisha u ka shpjeguar sot deputetëve të grupit parlamentar të PD-së progres-raportin e Bashkimit Evropian për Shqipërinë, duke u ndalur te mënyra se si, sipas tij, duhet lexuar ky dokument.
Në mbledhjen e grupit parlamentar, Berisha ka theksuar se raporti nuk duhet interpretuar sipas versionit të qeverisë, por në një lexim krejt tjetër politik nga ai që po paraqitet publikisht nga mazhoranca.
Një nga pikat ku ai është ndalur më gjatë ka qenë media. Gjatë mbledhjes, ai u kërkoi deputetëve demokratë të hapin “luftë” ndaj pronarëve të mediave që, sipas tij, “i shërbejnë mafias”, si edhe ndaj analistëve dhe komentatorëve që ai i konsideron në shërbim të qeverisë.
Berisha ka pretenduar se progres-raporti evidenton probleme serioze me lirinë e medias dhe kapjen e saj nga interesat pranë pushtetit, duke e përdorur këtë si argument për një përplasje më të fortë politike me mediat kritike ndaj opozitës.
Sipas tij, deputetët demokratë duhet ta përdorin raportin e BE-së si provë jo vetëm kundër qeverisë, por edhe kundër asaj që ai e konsideron propagandë mediatike në favor të Edi Ramës.
