Kryetari i Partisë Demokratike, Sali Berisha, ka ndalur turin e “Foltores” në Kurbin, ku ka mbajtur një fjalim të gjatë të shoqëruar me akuza të forta ndaj qeverisë, institucioneve shtetërore dhe kryeministrit Edi Rama.
Gjatë fjalës së tij, Berisha deklaroi se, sipas tij, agjenci shtetërore po përdoren për të ushtruar presion dhe dhunë ndaj biznesmenëve me qëllim tërheqjen e tyre nga tenderat publikë. Ai pretendoi se persona janë marrë peng dhe janë dërguar në ambiente private të lidhura me individë të botës së krimit, duke e cilësuar këtë situatë si të paprecedentë.
“A mund ta imagjinoni një agjenci shtetërore që merr peng njerëz, biznesmenë e punonjës, për t’i detyruar të tërhiqen nga tenderat?”, u shpreh Berisha, duke shtuar se, sipas tij, një realitet i tillë nuk ekziston në asnjë vend tjetër përveç Shqipërisë.
Në vijim, ai akuzoi kryeministrin Edi Rama për ushtrimin e presionit ndaj institucioneve të drejtësisë, përfshirë Gjykatën Kushtetuese dhe Kuvendin. Sipas Berishës, janë bllokuar procedura të rëndësishme, si heqja e imunitetit dhe marrja e vendimeve përkatëse, ndërsa mbledhje të gjata parlamentare janë mbyllur pa vendim dhe pa një afat për vazhdimin e tyre.
Në përfundim të fjalës, Berisha deklaroi se vendi ndodhet në një moment kritik, por theksoi se opozita është më e përgatitur se kurrë për reagim. Ai u shpreh se shqiptarët kanë përmbysur një diktaturë në të shkuarën dhe, sipas tij, janë të vendosur të reagojnë fuqishëm edhe ndaj situatës aktuale politike, duke bërë thirrje për revoltë më 22 Dhjetor.
Gjatë takimit, qytetarë dhe simpatizantë të Partisë Demokratike ngritën shqetësime edhe për reformën territoriale, duke kërkuar që Kurbini të kthehet sërish në bashki. Sipas tyre, zona është aktualisht jashtë vëmendjes së qeverisë dhe po përballet me mungesë investimesh dhe shërbimesh.
Një tjetër problematikë e theksuar nga qytetarët ishte emigracioni dhe largimi i fëmijëve, që vijon të mbetet një plagë e hapur për shumë familje shqiptare. Ata i kërkuan kreut të PD-së që në programin e tij politik të përfshijë politika mbështetëse për familjet, krijimin e vendeve të punës dhe fuqizimin e ekonomisë shqiptare.
