Në takimin me fermerët në Berat, Sali Berisha u ndal gjatë te debati për mendimin ndryshe brenda Partisë Demokratike, duke theksuar se partia është “100% e hapur për mendimin ndryshe”. Por, sipas tij, duhet bërë një dallim i qartë mes mendimit dhe qëndrimit ndryshe.
Berisha tha se çdo demokrat mund të shprehë lirshëm mendimin e vet në forumet e partisë pa pasur pasoja. Por, sipas tij, situata ndryshon kur mendimi shoqërohet me veprime që shkojnë në favor të kundërshtarëve politikë.
Për ta ilustruar këtë, ai iu referua drejtpërdrejt rastit të Ervin Salianjit. Berisha tregoi se para se të dilte nga burgu, Salianji kishte shkuar në zyrën e tij për t’i kërkuar mendim nëse duhej të firmoste një dokument ku garantonte se nuk do të vriste Fatmir Xhafën. Sipas Berishës, ai e kishte këshilluar të mos e firmoste, sepse një veprim i tillë do të nënkuptonte pranim faji.
Më pas, Berisha tha se ndërkohë që vetë sulmonte publikisht Ergys Agasin si “një nga figurat më të zeza”, Salianji, sipas tij, drekonte me të. Ai shtoi gjithashtu se nga Elbasani kishte marrë ankesa nga demokratë që pretendonin se Salianji përdorte emrin e Suel Çelës për të rreshtuar mbështetës.
Sipas Berishës, në këtë moment nuk bëhej më fjalë për mendim ndryshe, por për qëndrim ndryshe. Dhe për këtë arsye, tha ai, Salianji ishte “i vetpërjashtuar” nga Partia Demokratike.
