Kryetari i Partisë Demokratike, Sali Berisha, deklaroi sot se personat që hedhin molotovë gjatë protestave janë “disa të dëshpëruar”, duke iu përgjigjur pyetjes nëse protesta e thirrur prej tij do të jetë e dhunshme.
Sipas Berishës, ai dhe kreu i delegacionit të Bashkimit Europian, David McAllister, janë në të njëjtën linjë mendimi, pasi ky i fundit ka theksuar se “nuk ka vend për protesta të dhunshme”. Deklarata e liderit demokrat erdhi në një moment kur po shtohen diskutimet për formën dhe intensitetin e aksionit opozitar.
Megjithatë, cilësimi si “të dëshpëruar” për adoleshentët që hedhin molotovë gjatë protestave ka ngjallur pikëpyetje, sidomos nëse krahasohet me deklaratat e mëparshme. Vetëm dy ditë më parë, Berisha i kishte përshkruar ata si “heronjtë e mëdhenj të demokracisë”.
Ndryshimi i tonit pas vizitës dhe deklaratës së McAllister ka sjellë reagime dhe interpretime të ndryshme në opinionin publik, duke ngritur dyshime mbi qëndrimin e qartë të opozitës ndaj akteve të dhunës në protesta.
