Kreu i Partisë Demokratike, Sali Berisha, ka ndryshuar ritmin dhe mënyrën e komunikimit publik vetëm pak orë pasi SPAK e thirri për çështjen e “21 Janarit”. Në një bashkëbisedim online me qytetarët, Berisha njoftoi nisjen e një lëvizjeje të re politike, duke shpallur “Foltoren” dhe një tur takimesh në bazë me demokratët.
Berisha deklaroi se analiza e situatës politike do të nisë menjëherë dhe se ai vetë do të udhëtojë në të katër anët e vendit për të takuar mbështetësit. Synimi, sipas tij, është organizimi i një përballjeje të drejtpërdrejtë me atë që e quan “regjim”.
“Analiza do të nisë menjëherë dhe turi im në bazë do të nisë menjëherë. Pres të nis takime në të katër anët e vendit me qytetarë dhe demokratë me shpresën se shqiptarët me guximin dhe energjinë e tyre do përballen dhëmb për dhëmb me këtë regjim”, u shpreh Berisha.
Paralajmërimi i tij vjen në një moment të tensionuar politik, ku thirrja e SPAK për dosjen e 21 Janarit ka rikthyer debatin për përgjegjësitë e ngjarjes dhe rolin e tij si kryeministër në atë kohë.
