Kreu i Partisë Demokratike, Sali Berisha, akuzoi kryeministrin Edi Rama se ndryshimet e fundit ligjore të propozuara kanë për qëllim mbrojtjen e tij personale dhe të zyrtarëve të përfshirë në afera korruptive.
Në një deklaratë për mediat, Berisha u shpreh se amendamentet e propozuara synojnë, sipas tij, “asgjësimin e sistemit të drejtësisë” dhe mbrojtjen e anëtarëve të qeverisë nga hetimet.
Ai theksoi se pezullimi i zyrtarëve nga detyra është një e drejtë kushtetuese e prokurorisë dhe e gjykatave, që shërben për të mbrojtur interesin publik dhe funksionimin e ligjshëm të institucioneve.
“Edi Rama, për të mbrojtur krimet e tij monstruoze dhe vjedhjet e pallogaritshme, po kalon në veprime të tjera, në asgjësimin e sistemit të drejtësisë, në miratimin e ligjeve për të mbrojtur veten dhe bandën e tij plaçkitëse në qeveri”, tha ai.
Kreu i PD gjithashtu sulmoi edhe kreun e ri të AKSHI, Igli Tafa, të cilin e cilësoi si të lidhur me rrethin e afërt të kryeministrit.
Kryedemokrati u bëri thirrje qytetarëve t’i bashkohen protestës së 20 shkurtit për të rrëzuar, siç e quajti ai, “sistemin më kleptokratik që ka njohur Shqipëria”.
