Në përfundim të protestës së opozitës, nga selia e Partisë Demokratike të Shqipërisë, kryetari Sali Berisha akuzoi kryeministrin Edi Rama për përshkallëzim të situatës dhe sulm ndaj opozitës.
Ndonëse skenari ishte pothuajse i njëjtë me ata të mëparshmit, Berisha e krahasoi protestën e sotme me lëvizjen e vitit 1991.
Ai pretendoi se gjatë tubimit janë përdorur mjete të paligjshme kundër protestuesve dhe se, sipas tij, forcat e rendit kanë hedhur gaz edhe në territorin e selisë së PD-së.
Berisha tha se Edi Rama ka ndërmarrë një akt të pashembullt duke sulmuar selinë e PD-së. Kreu i PD paralajmëroi kryeministrin se, nëse guxon të sulmojë selinë e PD-së, selia e socialistëve gjurmë nuk do të gjejë.
Ai gjithashtu tha se protestat do të vijojnë në të gjitha format, ndërsa nuk dha një datë nëse do të ketë një tubim tjetër në ditët në vijim.
Sa i përket protestës, QSUT njofton se në spital është paraqitur një protestues i intoksikuar, por gjendja e tij është stabile, dhe deputeti Luçiano Boçi është paraqitur me dëmtime të lehta në lëkurë dhe po merr trajtimin e nevojshëm. Deri më tani nuk dihet nëse ka efektivë të lënduar.
Situata tashmë është qetësuar, ndërsa policia është pozicionuar afër selisë blu në tentativë për të arrestuar të rinjtë që hodhën bomba molotov dhe fishekzjarrë.
