Kryetari i Partisë Demokratike, Sali Berisha, i ka kërkuar Gjykatës Kushtetuese që të rrëzojë kërkesën e paraqitur nga Edi Rama në lidhje me pezullimin e Ballukut, pasi sipas tij ajo është në kundërshtim me ligjet e vendit.
“Gjykata Kushtetuese duhet të refuzojë kërkesën e paraqitur nga Edi Rama, pasi është në kundërshtim me legjislacionin e Republikës së Shqipërisë”, u shpreh Berisha.
Në deklaratën e sotme për mediat, Berisha tha se Prokuroria e Posaçme dhe Gjykata nuk kanë shkelur ligjet në kërkesën për pezullim. Sipas kreut të PD, ndaj zëvendëskryeministres duhet të lëshohet urdhër-arresti pasi po prish provat.
“Gjykata Speciale dhe Prokuroria në vlerësimet e tyre nuk kanë shkelur asnjë ligj me kërkesën që kanë bërë për pezullimin nga detyra. Po, ata kanë shkelur me dy këmbë ligjin me moskualifikimin e veprës ‘grup i strukturuar kriminal’ dhe moslëshimin e urdhër-arresteve për Lubi Ballukun, që po vazhdon të prishë provat ditë e natë në bashkëpunim me aparatin e Këshillit të Ministrave, sipas burimeve anonime. Ata që marrin në mbrojtje, ata që pretendojnë se po ndërhyhet në pushtetet e njëri-tjetrit, ata janë të paritur (të lahet me para)”, tha Berisha.
