Kryetari i Partisë Demokratike, Sali Berisha, ka pranuar gabimin për firmat e dhëna për kandidaturën e Endri Shabanit si Avokat i Popullit, duke kërkuar ndjesë publike ndaj demokratëve dhe qytetarëve shqiptarë. Nga foltorja në Elbasan, Berisha tha se firmat u dhanë në një kontekst tjetër politik dhe më pas u tërhoqën, por sipas tij, mazhoranca i përdori ato për të imponuar një zgjedhje të paligjshme.
“Ne bëjmë edhe gabime. Gabimi ishte shumë. Ju kërkoj ndjesë demokratëve dhe të gjithë shqiptarëve për ato firma që u vunë ndaj Shabanit, avokatit të Edi Ramës. Ato firma u tërhoqën, secili që firmosi e tërhoqi firmën, por Edi Rama, në mënyrë të paskrupullt, e zgjodhi”, deklaroi Berisha.
Ai akuzoi kryeministrin se ka vepruar në kundërshtim me Kushtetutën dhe standardet demokratike, ndërsa shtoi se përgjigjja politike do të vijë menjëherë. Sipas Berishës, ditën e nesërme Partia Demokratike do të mbledhë Kryesinë për të marrë vendime urgjente.
Nga Elbasani, Berisha paralajmëroi nisjen e protestave të pandalshme kundër qeverisë. “Nesër në drekë mblidhet Kryesia dhe vendos me urgjencë për fillimin e revoltave, protestave që nuk ndalen më kurrë deri në largimin e Edi Ramës”, u shpreh ai.
Në fjalën e tij, Berisha akuzoi qeverinë për abuzime të rënda financiare dhe ndërhyrje në drejtësi, duke iu referuar edhe vendimit për heqjen e masës së pezullimit ndaj Belinda Ballukut. “Sot Rama i diktoi gjykatës dhe i hoqi masën e pezullimit. Çfarë do bëjmë ne? Do ngrihemi dhe nuk do ndalemi deri në largimin e tyre”, tha Berisha.
Sipas tij, opozita ndodhet përballë një beteje vendimtare: “Ose do votojmë të lirë, ose do shuhemi. Ne nuk shuhemi kurrë, por do fitojmë”.
