"Nuk kam menduar asnjëherë arratisjen edhe kur kam qenë jashtë Shqipërisë në udhëtime. Familja ime nuk ka qenë e persekutuar dhe unë e ndjeja veten të privilegjuar të regjimit”, deklaroi në Syri TV Sali Berisha në rrëfimin e tij të përvitshëm për 8 dhjetorin, 35 vite pas lëvizjes studentore.
Ai pranoi se Sigurimi i Shtetit ndërhyri dhe futi segmente në PD, por nuk ia doli ta zotëronte atë. Sali Berisha tha sot se, pavarësisht dilemës që pati për të hyrë në politikë në ato ditë apo për t’u rikthyer në profesion, ai nuk është bërë pishman që zgjodhi politikën. Edhe pse këtë vit, sipas tij, motivi që zgjodhi politikën në atë vit të largët ’90 ishte Kosova.
Gjithsesi, fakt mbetet që në podiumin e protestës së studentëve të dhjetorit në vitin e largët ’90, Sali Berisha u shfaq fillimisht si profesor dhe pak javë më pas si lider i padiskutueshëm që drejton edhe sot PD. Në të njëjtën lëvizje u shfaq edhe Edi Rama, i cili u zhduk pak muaj më pas për t’u rifaqur disa vite më vonë, për të qenë sot kryeministër dhe Sali Berisha kryetar opozite.
Si dy produkte të një lëvizjeje me shumë dritë-hije, ndoshta me fije që lëvizin diku në zyrat e Komitetit Qendror të Partisë Komuniste, ata vijojnë edhe sot të drejtojnë fatet e shqiptarëve. Jo si rrjedhojë e paranojës së zhvilluar të shqiptarëve, por si pasojë e logjikës dhe fakteve postkomuniste që vijojnë të mbeten kaq prezente në Shqipërinë që kurrë nuk e nisi seriozisht procesin e dekomunistifikimit.
