Sali Berishës nuk i del e keqja me Altin Dumanin. Nuk i mjafton fakti që gjatë drejtimit të tij, SPAK arriti të hartojë dosje hetimore për pjesën më të madhe të ministrave të Edi Ramës, përfshirë edhe zëvendëskryeministren. Madje as dosja e Ergys Agasit, që i afrohet kaq pranë kryeministrit Rama, nuk duket se e kënaq kryetarin e Partisë Demokratike.
Edhe sot, Sali Berisha nuk i ka kursyer etiketimet dhe sulmet ndaj ish-kreut të Prokurorisë së Posaçme. Por kjo nuk ndodhi rastësisht. Fyerjet erdhën në momentin kur ai u pyet për hetimet pasurore që SPAK po zhvillon ndaj tij dhe familjes së tij.
Berisha nuk e mohoi faktin që Belind Këlliçi është thirrur në SPAK për t’u pyetur lidhur me financimet e Kuvendit të 20 dhjetorit. Megjithatë, ai vetë, në cilësinë e numrit një të Rithemelimit, nuk përmendi asnjë fakt konkret mbi shpenzimet e Kuvendit të dhjetorit 2022, i cili de facto e riktheu Sali Berishën në krye të Partisë Demokratike.
Sali Berisha pretendon se hetimi pasuror ndaj tij, proceduralisht, ka përfunduar. Por askush, përveç prokurorëve të SPAK-ut, nuk mund të thotë me siguri se çfarë po hetohet ende. Ndërkohë, njëri pas tjetrit, organizatorët e Kuvendit të Rithemelimit po thirren për t’u pyetur mbi shpenzimet e majme të këtij organizimi, shpenzime për të cilat Berisha kishte premtuar se do t’i bënte publike.
Një premtim që, deri më sot, nuk u mbajt kurrë.
