Kryetari i PD, Sali Berisha, ka përdorur edhe sot të miturit që u arrestuan gjatë protestës së mbrëmshme, për të denoncuar dhunën e policisë. Në deklaratën e sotme për mediat, në vend që të kërkonte falje për shfrytëzimin e tyre në përplasje me policinë, Berisha zgjodhi t’u përmendë emrat publikisht, duke i quajtur si krenaria e kombit.
“Dua t’u them këtyre të rinjve se janë krenaria e mbarë kombit. Janë krenaria e kombit shqiptar. E nisin jetën politike në një betejë me të keqen e kombit të vet”, tha Berisha.
Në fakt, të lexosh emrat e të miturve live në media është shkelje e ligjit dhe etikës, e jo më t’i trajtosh si heronj pasi i fton në tubime dhe ata përplasen me policinë. Pikë së pari i duhet kërkuar ndjesë familjarëve të tyre që normalisht janë në merak për fëmijët e ndaluar nga policia.
Kreu i PD tha po sot në konferencë për shtyp se në spital nuk kishte asnjë polic të lënduar dhe këtë e bazoi në vizitën që bëri te “Trauma”. Sipas Berishës, personeli i spitalit e njoftoi se “aty ishin dërguar 5 policë pa asnjë problem dhe nuk kishin asnjë lloj shqetësimi. Ishin larguar siç kishin ardhur”.
Ajo çka dukej qartë nga raportimet live nga protesta, siç pati qytetarë të lënduar, kishte edhe policë që u plagosën. Gjysmë të vërtetat nuk e ndihmojnë situatën, sidomos kur bëhet fjalë për një protestë që u transmetua live nga të gjitha TV-të. Sikundër njoftimi për një protestë të ardhshme më 20 shkurt dhe aktet e dhunës nga të gjithë palët nuk janë ftesë e mirë për qytetarët që kanë zgjedhur të protestojnë kundër qeverisë.
