Kreu i Partisë Demokratike, Sali Berisha, në daljen e radhës për mediat akuzoi kryeministrin Edi Rama dhe ish-zëvendëskryeministren Belinda Balluku se po përpiqen të përmbysin në Gjykatën Kushtetuese vendimin e ligjshëm të Gjykatës së Posaçme Antikorrupsion.
Sipas tij, kërkesa e depozituar në Kushtetuese nuk është një veprim institucional, por një tentativë për të shpëtuar nga përgjegjësia “për vjedhjet në flagrancë në Drejtorinë e Përgjithshme të Rrugëve”, për të cilat Balluku është nën akuzë dhe e pezulluar nga detyra.
“Dje njoftova se do paraqes të gjitha argumentet e pakundërshtueshme ligjore që faktojnë se dyshja Rama-Balluku, në kundërshtim flagrant me Kushtetutën dhe ligjet e vendit, përpiqen të mbrojnë vjedhjen që kanë kryer.
Të kapur në flagrancë me vjedhjet e mëdha të taksave të qytetarëve, Edi Rama dhe Lubi Balluku, në përpjekje të dëshpëruar për t’u mbrojtur nga krimi i tyre i përbashkët, janë vërsulur me tërbim drejt Gjykatës Kushtetuese, duke shpallur me mediat e tyre si puçist e antikushtetues vendimin e gjykatës speciale për pezullimin e Lubi Ballukut — de facto për vjedhjen në bashkëpunim me Ramën dhe organizatën e tyre kriminale në Drejtorinë e Rrugëve.
Këta bashkë-hajdutë shkuan së bashku në Gjykatën Kushtetuese për të përmbysur vendimin e ligjshëm të GJKKO-së dhe po përdorin të gjitha mjetet e presionit që u jep pushteti”.- tha ai në daljen e sotme në konferencen për shtyp.
