Kryetari i Partisë Demokratike, Sali Berisha, i ka dhënë fund justifikimeve që përdorte për të shmangur dëshminë e tij në SPAK për çështjen e “21 Janarit”. Në deklaratën e sotme për mediat, kreu i PD-së tha se do të paraqitet ditën e nesërme në SPAK për këtë çështje.
“Do të shkoj, nesër do të jem aty. Është hetim politik, pasi kjo çështje ka qenë e hetuar më parë. Por nuk jam thirrur, nuk jam marrë në pyetje; nuk u leverdiste të më thërrisnin sepse isha njeriu i sulmuar, i rrethuar. Sigurisht që do të shkoj; kam qenë 5–6 orë në rrethim në përpjekje për të pushtuar Kryeministrinë”, tha Berisha.
Kryedemokrati komentoi edhe pjesëmarrjen e ulët të qytetarëve në protestën e djeshme para Kryeministrisë. Ai theksoi se nuk bëhej fjalë për protestë, por për një foltore-parlament.
“Po keqinterpretoni të vërtetën. Dua të falënderoj qytetarët për pjesëmarrjen. Dje u mbajt foltorja e re para pallatit të krimit. Ne nuk kemi thirrur miting dhe nuk do të thërrasim. Nuk thërrasim ne. Nëse ne vendosim për një protestë masive, bie ndesh me të parën. Nuk ka qenë protestë kombëtare, por foltore parlamentaro-qytetare. Vijnë ata që duan të vijnë”, tha ai.
