Ish-kryeministri Sali Berisha deklaroi se ndaj protestuesve është përdorur edhe ajo që ai e quajti “spraj i ariut”, duke e përshkruar si një mjet shumë të fortë irritues që, sipas tij, është përdorur për të shpërndarë turmën.
Por çfarë është në të vërtetë “spraj i ariut”?
I njohur në anglisht si bear spray, ai është një spraj mbrojtës që përdoret kryesisht në Amerikën e Veriut për t’u mbrojtur nga arinjtë dhe kafshët e mëdha në natyrë. Substanca kryesore e tij është kapsaicina, e njëjta përbërje që gjendet në specat djegës dhe që përdoret edhe në spray-t e zakonshëm të vetëmbrojtjes.
Kur spërkatet, kjo substancë shkakton djegie të fortë në sy dhe në lëkurë, lotim të menjëhershëm, irritim të rrugëve të frymëmarrjes dhe verbim të përkohshëm. Efekti është zakonisht i përkohshëm, por shumë i fortë për disa minuta.
Ndryshe nga spray-t e zakonshëm të vetëmbrojtjes, “spraj i ariut” është projektuar për të krijuar një re më të gjerë irrituese dhe për të vepruar në distanca më të mëdha, pikërisht për të ndalur një kafshë të madhe që afrohet.
Nuk është e qartë nëse në rastin për të cilin foli Berisha bëhet fjalë për këtë lloj spray-i specifik apo për spray irritues të zakonshëm, si ata që përdoren nga policia për kontrollin e turmave, por termi “spraj i ariut” përdoret zakonisht për të përshkruar një formë shumë të fortë të spray-t me kapsaicinë.
