Kreu i Partisë Demokratike, Sali Berisha, deklaroi se ish-drejtoresha e AKSHI-t, Mirlinda Karçanaj, ka qenë vetëm zbatuese e urdhrave të bashkëshortes së kryeministrit, Linda Rama. Në mbledhjen e grupit parlamentar të PD-së, Berisha tha se në fakt Agjencia Kombëtare e Shoqërisë së Informacionit është drejtuar de facto nga “Linda e Surrelit”, Ergys Agasi dhe baxhanaku i Edi Ramës, Frangu.
Sipas tij, mbrojtja që kryeministri i bën Karçanajt lidhet me interesa familjare dhe është pjesë e një përpjekjeje për të mbyllur skandalin.
“Mirlinda e AKSHI-t ka qenë thjesht një zbatuese, për arsye se AKSHI-n de facto e ka drejtuar Linda e Surrelit, Ergys Agasi dhe baxhanaku i Edi Ramës, Frangu. Pra rezulton se edhe kjo mbrojtje që i bën Edi Rama Mirlindës së AKSHI-t është për interesa strikt familjare. Dhe kemi të bëjmë me një përpjekje tjetër për të groposur një çështje që, në përmasa tërësore financiare, ligjore dhe mafioze, tejkalon çdo aferë tjetër të këtij vendi. Megjithatë, deri tani dosja është turshi. Ergys Agasi është i lirë. Qytetari dixhital thotë se shkon edhe në Surrel”, deklaroi Berisha.
Lideri i opozitës u ndal veçanërisht te figura e Ergys Agasit, i cili është shpallur në kërkim, duke pretenduar se ai vazhdon të jetë i lirë.
Por ajo që bie në sy është se gjatë gjithë muajve që skandali i AKSHI-t është në qendër të debatit publik, Berisha nuk ka përmendur pothuajse asnjëherë emrin e Ermal Beqirit. Edhe pse, sipas dosjes së hetimit, mbi të rëndojnë akuza të ngjashme me ato ndaj Ergys Agasit.
Kjo heshtje ka ngritur pikëpyetje: është thjesht një rastësi apo një përzgjedhje e kujdesshme në mënyrën se si artikulohen denoncimet politike?
Kur bëhet fjalë për Sali Berishën dhe stilin e tij të akuzave publike, rastësitë zakonisht janë të rralla.
