Kryetari i Partisë Demokratike, Sali Berisha, akuzoi sot qeverinë se ka mashtruar pensionistët me skemën e bonusit për zgjedhjet e 11 majit. Në një konferencë për mediat, Berisha u shpreh se fondet për këtë shtresë në nevojë ende nuk janë shpërndarë, ndërsa pensionistët përballen me rritje të çmimeve.
“Kanë kaluar muaj që nga zgjedhjet dhe pensionistët nuk kanë marrë një qindarkë nga fondi i depozituar në Bankën e Shtetit prej 240 milionë eurosh, para të pashpenzuara gjatë vitit 2025,” tha Berisha. Ai shtoi se, sipas vendimeve të qeverisë, këto fonde do të disbursoheshin si bonus për pensionistët, por deri tani nuk është realizuar asnjë pagesë.
Berisha akuzoi qeverinë se po përdor fondin për qëllime të tjera dhe se shpërndarja e tij është shtyrë për fundin e vitit, duke theksuar se kjo situatë e vështirësohet nga çmimet e larta që rriten çdo javë.
Sipas tij, skema e bonusit është “mashtrim” për mbi 45 përqind të pensionistëve, të cilët ose nuk marrin asgjë, ose përfitojnë shumë pak.
