Kryetari i PD, Sali Berisha, ka vijuar me akuza të reja ndaj policisë pas përplasjeve në protestën e fundit, ndërsa kësaj here tha se janë hedhur molotovë ndaj protestuesve nga tarracat e institucioneve.
Në deklaratën për mediat, Berisha tha se gjatë protestës janë hedhur “granata, lëndë kimike me rrezik të lartë, mjete verbuese dhe substanca toksike”. Ai theksoi se për këto veprime “ka edhe dëshmitarë”.
Deklarata e kryedemokratit jep përshtypjen sikur protestën e bëri policia dhe jo opozita, por edhe pse pretendoi se ka dëshmitarë, ai nuk tha se do ta padiste rastin në prokurori.
Kreu i demokratëve premtoi sërish se protestat paqësore do të vazhdojnë, ndërsa datën se kur do të mbahet e radhës ende nuk e kishte vendosur.
Me gjasë, Berisha pret një përgjigje nga forcat e tjera opozitare, duke qenë se përsëriti thirrjen që të bëhen bashkë në një front përballë qeverisë që e quan “narkoregjim”.
