Kreu i Partisë Demokratike, Sali Berisha, ka hedhur akuza të rënda ndaj kryeministrit Edi Rama, duke pretenduar se ai është i përfshirë në ngjarje kriminale dhe madje ka porositur vrasje.
Berisha u shpreh se Rama po shmang përballjen në Kuvend dhe nuk po merr pjesë në asnjë interpelancë të thirrur nga opozita, pasi sipas tij po mbrohet nga mazhoranca.
“Pse e fshihni kreun e organizatës kriminale Edi Ramën nga parlamenti? Pse nuk paraqitet në asnjë interpelancë? Pse nuk del këtu?”, u shpreh Berisha, duke shtuar se, sipas tij, kryeministri përmendet në një dëshmi nën betim në gjykatë si person që ka porositur vrasje.
Tre ditë më parë e akuzuan në sallën e gjyqit ndër betim se ka porositur vrasje. E dëgjuat ju këtë? Ka porositur vrasje. Jeni dëshmitarë kur i thoshte tjetrit ta dimë targën. Kur i thuhet tjetrit të di targën, do të thotë të marr nishan. Ta di targën, i thoshte. E ke personale, i thoshte.
Ja që del dëshmitari në gjyq tani dhe i thotë se ka porositur vrasje. Prandaj nuk del këtu ai. A ekziston për këtë pseudomazhorancë ligji i konfliktit të interesit? Jo. Me tre vendime i ka dhënë vëllait të vet 38 mijë metër katrorë. Sarajet e tij janë me 8400 metër katror oborr-park. Të deklaruara vetëm 4 mijë, edhe ato nga tokë bujqësore të shndërruara në kopsht me hajni.
Pse e fshihni ju Edi Ramën? Si do kaloni ju në këtë mënyrë? Cili ishte ministri i Brendshëm që ka porositur vrasje me të? Na thuaj pak se është deklaratë nën betim, është dëshmi nën betim ajo para gjykatësit.
