Deputeti socialist Erion Braçe ka lëshuar kritika të drejtpërdrejta ndaj drejtueses politike të PS-së në Fier, Belinda Balluku, duke thelluar perceptimin për tensione dhe pakënaqësi të brendshme në kampin socialist.
I ftuar në emisionin “Kjo Javë”, Braçe u pyet për situatën në qarkun e Fierit, ku më parë ka qenë deputet, dhe për rolin e Ballukut si drejtuese politike e këtij qarku.
Deputeti socialist deklaroi se nuk sheh asnjë angazhim të saj në çështjet që lidhen me bujqësinë, ndërsa kritikoi edhe ministrin e Financave Petrit Malaj, deputet në Lushnjë.
“Do doja që prezenca e saj në Fier të ndihmonte në çështje në lidhje me bujqësinë. Deri tani nuk e shoh. Nuk shoh as ministrin e Financave që është deputet në Lushnje të angazhuar me atë problematik. Fare zero”, u shpreh Braçe.
Ai ngriti shqetësime edhe për situatën e sigurisë ushqimore, duke paralajmëruar se sipas tij po krijohet një klimë që rrezikon të godasë padrejtësisht gjithë sektorin bujqësor.
Sipas Braçes, shumica e fermerëve shqiptarë prodhojnë “mirë dhe ndershëm”, ndërsa theksoi se nuk mund të përdoret problematika e sigurisë ushqimore për të shkuar drejt monopolizimit të tregut.
Deklaratat e Braçes vijnë në një moment kur brenda Partisë Socialiste po shtohen zërat kritikë dhe distancimet publike ndaj Ballukut, e cila shihet ende si një nga figurat më të fuqishme të mazhorancës.
