Ministria e drejtuar nga Belinda Balluku, aktualisht nën akuzë nga SPAK, ka dështuar në disa drejtime të përmbushë detyrimet ndaj Bashkimit Europian.
Këshilli Ministror i Komunitetit të Energjisë, i përbërë nga ministrat e energjisë të të gjitha vendeve të BE-së, ka miratuar një vendim ku konstaton se Shqipëria ka dështuar të zbatojë detyrimet që burojnë nga Traktati i Komunitetit të Energjisë, duke shkelur një sërë direktivash dhe rregulloresh kyçe të Bashkimit Europian në fushën e tregut të energjisë elektrike.
Vendimi është marrë pas një procedure formale hetimi dhe ndjekjeje institucionale, të iniciuar nga Sekretariati i Komunitetit të Energjisë më 29 maj 2024, si dhe pas opinionit të Komitetit Këshillimor të datës 24 nëntor 2024.
Sipas nenit 1 të vendimit, Shqipëria nuk ka miratuar dhe zbatuar në legjislacionin kombëtar një sërë aktesh thelbësore të BE-së për funksionimin e tregut të energjisë.
Po ashtu, Shqipëria ka dështuar të njoftojë në kohë Sekretariatin për masat e marra, duke shkelur drejtpërdrejt vendime të mëparshme të Komunitetit të Energjisë të viteve 2021 dhe 2022, si dhe nenet 6 dhe 89 të Traktatit themelues.
Këshilli Ministror i kërkon Shqipërisë që të marrë menjëherë të gjitha masat e nevojshme për të korrigjuar shkeljet dhe të sigurojë përputhshmëri të plotë me legjislacionin e Komunitetit të Energjisë.
Vendimi përcakton gjithashtu një afat përfundimtar: 1 korrik 2026.
Nëse deri në këtë datë Shqipëria nuk ka korrigjuar shkeljet, Sekretariati i Komunitetit të Energjisë ftohet të nisë procedurë të mëtejshme sipas nenit 92 të Traktatit, i cili parashikon masa ndëshkuese, përfshirë kufizime të të drejtave të vendit në strukturat e Komunitetit të Energjisë.
Ky vendim përbën një sinjal të fortë politik dhe institucional për autoritetet shqiptare, në një moment kur vendi synon thellimin e integrimit europian dhe harmonizimin me standardet e BE-së në sektorin strategjik të energjisë.
