Kryetari i Grupit Parlamentar të PD, Gazment Bardhi, ka akuzuar kryeministrin Edi Rama se po mbron zyrtarë të lartë të përfshirë në hetime nga SPAK, duke e cilësuar atë si “garant të korrupsionit”.
Në një postim në facebook, Bardhi i është referuar dy rasteve që sipas tij janë të lidhura me hetime për korrupsion, duke përmendur zëvendëskryeministren Belinda Balluku dhe drejtuesen e AKSHI-t, Mirlinda Karçanaj. Sipas tij, në të dy rastet, mbrojtja politike e tyre nga kryeministri lidhet me, siç pretendon ai, lidhje që “çojnë tek familja Rama”.
“Dy rastet kanë një të përbashkët: të çojnë tek familja Rama. Njëra tek vetë Edi Rama, tjetra tek bashkëshortja e tij”, ka deklaruar Bardhi, duke shtuar se mbrojtja ndaj tyre nuk është rastësore.
Ai ka përmendur gjithashtu akuza për tendera publikë dhe lidhje të mundshme me persona të afërt me qeverinë, duke pretenduar se kryeministri ishte në dijeni të zhvillimeve të lidhura me AKSHI-n dhe procedurat e tij.
Bardhi ka reaguar edhe ndaj deklarimeve të mëparshme të kryeministrit për drejtuesen e AKSHI-t, duke thënë se zhvillimet e fundit, përfshirë sekuestrimin e pasurive të saj nga SPAK, sipas tij e bëjnë të domosdoshme një reagim publik të kreut të qeverisë.
“Edi Rama ka detyrimin të kërkojë ndjesë publike dhe të japë llogari para shqiptarëve”, është shprehur ai.
Deklaratat e Bardhit janë shoqëruar edhe me një video nga një dalje e mëparshme publike e kryeministrit Rama lidhur me çështjen në fjalë.
