Kryetari i Grupit Parlamentar të PD, Gazment Bardhi, ka akuzuar Presidentin e Republikës, Bajram Begaj, se prej 47 ditësh po pengon procedurën e betimit të gjyqtarit kushtetues të zgjedhur, Asim Vokshi, duke futur në ngërç vetë funksionimin e Gjykatës Kushtetuese. Sipas Bardhit, ndërhyrja e presidentit është tërësisht antikushtetuese, cënon pavarësinë dhe integritetin e Gjykatës dhe shkel ligjet e vendit.
“Ky mosveprim është në kundërshtim flagrant me nenin 129 të Kushtetutës dhe nenin 8 të Ligjit nr. 8577/2000 “Për Organizimin dhe Funksionimin e Gjykatës Kushtetuese”. Asnjë President përpara tij nuk ka guxuar të sillet në këtë mënyrë me Gjykatën Kushtetuese të Republikës së Shqipërisë”, thotë Bardhi.
Bardhi shton se prej ditës së parë në detyrë, Begaj po vepron në favor të interesave politike të Edi Ramës dhe Partisë Socialiste, duke u shndërruar në një mburojë për të penguar shqyrtimin nga Gjykata Kushtetuese të shkeljeve të Kushtetutës dhe ligjit.
Ai bën thirrje që Gjykata e Lartë dhe Gjykata Kushtetuese të reagojnë menjëherë ndaj asaj që e quan “përdhosje e autoritetit të dy gjykatave më të larta në vend”. Bardhi akuzon presidentin si një figurë “tërësisht e papërgjegjshme”, që po vepron në interes të Ramës dhe aferave të tij korruptive.
“Prej ditës së parë në detyrë, Bajram Begaj i ka shërbyer vetëm interesave politike të Edi Ramës dhe Partisë Socialiste. Këta të fundit u shndërruan së fundmi në mburojë politike për të mos lejuar shqyrtimin nga Gjykata Kushtetuese të shkeljeve të rënda të Kushtetutës dhe ligjit nga Bajram Begaj në ushtrimin e detyrës së Presidentit të Republikës”, shkruan nënkryetari i PD.
Sipas Bardhit, mosveprimi i Begajt po pengon fillimin e detyrës së gjyqtarit Vokshi dhe krijon një precedent të rrezikshëm për funksionimin e Gjykatës Kushtetuese. Ai thekson se kjo sjellje pa shpjegime publike tregon se presidenti ka humbur rolin e tij si garant i Kushtetutës dhe thekson nevojën urgjente për reagim nga institucionet më të larta të drejtësisë në vend.
