Belinda Balluku, zgjodhi t'ia besojë mbrojtjen ligjore përballë drejtësisë motrës së saj Pamela Qirko, ish-kryetare e Komisionit të Pavarur të Kualifikimit (KPK), i njohur ndryshe si shkalla e parë e procesit të vetingut për gjyqtarët dhe prokurorët.
Kjo lëvizje shihet si strategjike, pasi, përveç përgatitjes profesionale të Qirkos, Balluku siguron gjithashtu që dokumentet e dosjes të mos rrjedhin në publik.
Pamela Qirko u paraqit në ambientet e SPAK rreth orës 14:40 dhe priti në hyrje të strukturës antikorrupsion deri në mbërritjen e së motrës, zv.kryeministres Balluku. Të dyja bashkë qëndruan për rreth 40 minuta përpara prokurorëve të posaçëm, ku u njohën me aktakuzën.
Balluku akuzohet për shkelje të barazisë në tendera, një çështje që lidhet me tenderin për ndërtimin e tunelit të Llogarasë. Fillimisht, në vitin 2020, tenderin e fitoi kompania “Gjoka Konstruksion”, por ai u anulua dhe u zhvillua sërish në vitin 2021, ku fituese u shpallën dy kompani turke të bashkuara në një konsorcium.
Dyshohet se vlera e tenderit është rritur me mbi 50 milionë euro krahasuar me projektin fillestar.
Në këtë përballje me drejtësinë, Balluku do të mbrohet nga motra e saj. Sipas të dhënave të Qendrës Kombëtare të Biznesit (QKB), Pamela Qirko është regjistruar si person fizik vetëm ditën e djeshme — një hap i nevojshëm ligjërisht për të ushtruar profesionin e avokates dhe për të përfaqësuar motrën e saj përpara SPAK-ut.
Ironikisht, Qirko do të ketë përballë disa prej personave që dikur i është dashur t’i vlerësonte vetë, në kohën kur ishte anëtare e KPK-së. Mes tyre është edhe prokurori i posaçëm Dritan Prenci, i cili ka ngritur akuzën ndaj Ballukut — dhe që dikur është konfirmuar në detyrë nga trupa ku bënte pjesë vetë Pamela Qirko.
